ಸಭ್ಯ ಪೋಲಿ ಕವನ ...

ಕಾಳನಿಶಿ ನಶೆಯ ಹಬ್ಬಿಸಿ ಬಾನ ತಬ್ಬಿದೆ 

ಪೂರ್ಣಶಶಿ ಬಿಂಬ ಮೂಡಿದೆ 

ಬಾ ಗೆಳತಿ 

ಪ್ರಣಯ ಕಡಲೊಳು 

ತನುವ ನೌಕೆ ಇಳಿಬಿಟ್ಟು 

ಅನಂಗರತಿ ಜೋಡಿಯ ಅನಾದಿ ಜಾಡಲಿ 

ಅನಂಗನಾ ರತಿ ನೀನಾಗಿ 

ಉಬ್ಬು ತಗ್ಗುಗಳ 

ಅನಾಮಿಕ ತಿರುವುಗಳ ತಾಕಿ 

ತೇಲಿ ತೇಲಿ ಅಲ್ಲಲ್ಲಿ ಮುಳುಗಿ 

ಈಜಿ ಈಜಿ 

ರಸಕಡಲ  ಸೀಳಿ 

ಬ್ರಹ್ಮಾನಂದದ ದಾರಿ ಹುಡುಕುವ 

ಉನ್ಮತ್ತ ಧ್ಯಾನದ ಉತ್ತುಂಗ  ಸೇರುವ 

ಬಾ ಗೆಳತಿ ಬೇಗ ಬಾ 

ಎಲ್ಲ ಎಲ್ಲೆಯ  ಮೀರಿ ಜಗದೆಲ್ಲ ಬೇಲಿಯ ದಾಟಿ 

ಮನದ ದುಗುಡ ದುಮ್ಮಾನ ಬಿಗುಮಾನವೆಲ್ಲ 

ಬೆವರಾಗಿ ಹನಿಯಲಿ 

ಕಿಬ್ಬೊಟ್ಟೆಯಾಳದ ಕನವರಿಕೆಯೆಲ್ಲ 

ಬಚ್ಚಿಟ್ಟ ಆಸೆಗಳೆಲ್ಲ ತಡೆಹಿಡಿದ ಕಳ್ಳಕನಸುಗಳೆಲ್ಲ 

ಹಿರಿಕಿರಿಯ ಸುಖದ ಝೇಂಕಾರದಲೆಯಾಗಿ 

ಸುತ್ತಲ ನೀರವ ಕದಡಲಿ 

ರೋಮ  ರೋಮದಿ ಮಿಂಚು ಚಲಿಸಿ 

ನಡೆಯಲಿ ತನು ಮಥನ 

ಬಾಳ ನಿಜ ಸುಧೆಗಾಗಿ 

 ಬಹಿರಂಗ ಅಂತರಂಗದೊಳು ಲೀನವಾಗಿ 

ಜೀವ ರಸ ಚಿಮ್ಮಿ 

ಸೃಷ್ಟಿ ಗುಟ್ಟು ಕತ್ತಲಲಿ ಬಯಲಾಗಲಿ

ಇರುಳು ಬೆಳಕಾಗಲಿ