ಕಿವಿಮಾತು

ಹೋಮ ಹವನ, ಪೂಜೆ ಪುನಸ್ಕಾರ,
ಜಪತಪ, ಮಂತ್ರತಂತ್ರ
ನೂರಿವೆ ಜಗದಿ
ಒಳಹುಳುಕ ಮುಚ್ಚಿ ಮುಕ್ತಿಗೇರಲು

ಇಲ್ಲಿ ಚೆಂದಾಗಿ ಬಾಳದೆ
ಮತ್ತೆಲ್ಲೋ ಮೇಲೆ
ಸೊಗದ ಬಾಳರಸೋ
ಯಾಕಿಂತ ಕಸರತ್ತು?

ಚೆಂದನೆ ಮನ ಹರವಿಕೊಂಡು
ಅಲ್ಲಿ ಸುತ್ತಲ ಜಗವ
ಬರಮಾಡಿಕೊಂಡು
ಎಲ್ಲರಲ್ಲೂ ನಮ್ಮ ಕಂಡು
ನಾವು ನಾವಾಗಿ ಸಾಗೋಣ ನಿರ್ಲಿಪ್ತರಾಗಿ
ಕಾಲದೊಡನೆ

ಇಲ್ಲೇ ಎಲ್ಲವಿದೆ
ನಾಕ, ಮುಕ್ತಿ,
ಮತ್ತೆ
ಅವನೆಲ್ಲ ಮೀರಿದ್ದು...

ನಾವು

ರತ್ನ ಗರ್ಭವ ಹೊತ್ತು
ಅಂಡಲೆವ ತಿರುಕರು ನಾವು!
ನಮ್ಮೊಳವರಿಯದೆ ಸುಮ್ಮನೆ ಅಲೆವವರು
ಏನೋ ಗೌಣವ ಹುಡುಕಿ!
ಇಲ್ಲವೇ ಎಲ್ಲವೂ ನಮ್ಮೊಳಗೆ?
ಸುಪ್ತ ಅಂತರಗಂಗೆಯಾಗಿ!
ನೂರಾರು ಕನಸುಗಳ ಆಸೆಗಳ ಕುಬೇರರು!

ಮನಕೆ ಬೇಲಿಯ ಬಿಗಿದು
ಕಿರುಪರಿಧಿಯಲಿ ಶೂನ್ಯಾದಿ ದೃಷ್ಟಿ ನೆಟ್ಟು
ಎಟುಕದ ಆಸೆಗಳ ಕನಸುಗಳ,
ಕೊನೆಗೆ ನಿರ್ಲಿಪ್ತ ಕಾಲವನ್ನೇ ಜರಿದು
ಬೊಮ್ಮ ಗೀಚಿದ್ದಿಷ್ಟೇ
ಎಂದು ಬಾಳುಕಳೆವ
ಭಾವವಾಮನರು.

ಎಲ್ಲ ಸುಳ್ಳುಪೊಳ್ಳು-ಸಣ್ಣತನ
ಡಂಭಾಚಾರದಲೇ
ಸಾವೇ ಇಲ್ಲವೆಂಬಂತೆ ಬದುಕಿ
ಸತ್ತಮೇಲೆ ಬದುಕಿಯೇ ಇಲ್ಲವೆಂಬಂತಾಗುವ
ಜೀವಂತ ದಿವಂಗತರು ನಾವು!